EDITORYAL: Extended pa, rehistrasyon ng simcards

Photo credit: https://newsinfo.inquirer.net/1754455/dict-only-36-79-percent-registered-sims-as-of-april-7

 

Extended pa, rehistrasyon ng simcards

Naka-register na ba ang sim card mo?

Ito ang tanong sa ipinasa na batas ng senado ukol sa subscriber identity module (SIM) ng Republic Act No. 11934 o “an act requiring the registration of all users of prepaid subscriber identity module (SIM) cards” o mas kilala sa “SIM Registration Act” para labanan ang lumalaganap na scam at kung ano pang mga masamang gawain gamit ang sim card number. 

Samantala, may mga ibang organisasyon at indibidwal pa rin ang patuloy na nagpahayag ng kanilang saloobin at pagkabahala ukol sa kanilang pribado at seguridad ng numero lalo pa't sa pagpaparehistro ay kakailanganing magbigay ng personal na impormasyon.

Ayon naman sa pahayag ng privacy international, ang "Sim Registration Act" ay hindi naging maganda ang epekto sa pagpapabawas ng krimen bagkus ito ay mas lumala pa sa pamamagitan ng online transactions.

Ang ilan sa mga bansa na nagpatupad ng batas na ito ay nagkaroon pa ng pagtaas ng mga krimen kaugnay na ang identity theft at paglitawan ng mga tinatawag na black market na nagserserbisyo sa mga nagnanais na manatiling itago ang pagkakakilanlan.

Ngunit, kung sino man ang hindi susunod sa itinakdang panahon at mga pamantayan ng pagpaparehistro ay magmumulta, mapuputulan o madi-deactivate ang simcard at hindi na muling magagamit pa. Ito Ang parusang ipapataw ng National Telecommunications Commission (NTC) sa mga Hindi makakasunod sa Pamantayan.

Maraming umapila sa parusang ito sapagkat hindi naman lahat ng mamamayan ay may identification card o ID ng pamahalaan at may maganda o pirming kalidad na access ng Internet upang makapagparehistro.

Gayunpaman, patuloy pa rin ang pagpapalawig ng pamahalaan sa batas na ito. Kasabay nito ang pagkalap ng datos na inilabas ng Department of Information and Communications Technology (DICT) kung ilan na nga ba at kung ano pa ang dahilan kung bakit marami pa ang hindi nakapagpaparehistro upang ito'y maaksyunan at maagapan.

Sa puntong ito, iba’t ibang komento ang inihayag ng bawat isa, ang iba ay nangangamba pa rin dahil sa kakulangan ng requirements at hindi maayos ang sistema o hakbang na gagawin.

Marami namang natuwa at sumang-ayon sa bagong batas na ito sapagkat napapanahon nga naman ang pagdami ng mga scammer at ilegal na aktibidad na nangyayari gamit ang iba’t ibang numero para sa transakyon nila sa online banking o sa iba pang aplikasyon sa pagpapadala ng pera.

Tunay na isa ito sa mga problemang dapat agapan upang maiwasan at mabawasan ang mga krimen, panloloko at iba pang ilegal na gawain na nangyayari gamit ang personal na numero.

Pahayag naman muli ng NTC, huwag mangamba ang mamamayan dahil makasisiguro ang mga subscriber na ligtas at hindi ito gagamitin sa mga kung ano-anong aktibidad. Ang Anumang impormasyon sa dokumento ng rehistrasyon ay lubos na kompidensiyal o lihim maliban kung pinahintulutan ng subscriber sa pamamagitan ng pagsulat na makuha ito.

Hindi rin naman agad matatanggal ng mga mobile user ang kanilang mga agam-agam o kanilang pagkabahala ukol sa batas na ipinatupad ngunit pahayag naman ng pamahalaan na mas makakabuti na makinig at sumunod sa pamantayan na batas at makapagparehistro sa takdang panahon.

Ang mga krimen na nangyayari gamit ang personal na numero sa iba’t ibang telecom ay dumarami matapos ang pagpaparehistro. Usapin pa ang inside job na tinatawag ng ilan dahil na nababawasan ang kanilang savings sa mga online banking application na ginagamit nila kahit hindi nila ito ginawa.

Kung inyong matatandaan, nakaraang buwan ay naging mainit ang balita ukol sa GCash Application na bigla na lamang nawawala ang kanilang pera at may biglang naipapadala ito sa hindi kilalang numero.

Gaano nga ba kaligtas ang pagpaparehistro ng mga numero na ginagamit natin? Ang pagbibigay ng mga personal na impormasyon at pag-upload ng government ID’s, ligtas ba talaga itong maitatago ng mga nagmomonitor ng registration platform sa iba’t ibang telecom?

Kung magiging matagumpay na ang lahat ng mamamayan sa bansa ay nakakapagrehistro na, makatitiyak na ba ang pamahalaan na mababawasan ang krimen sa bansa o para lang maipakita sa ibang bansa na kunyari may iisang sistema ang Pilipinas gaya ng ibang bansa?…na umuunlad tayo?

Isinulat ni Maureen Louise B. Cabanalan